තම රජය යටතේ කිසිදු මත්ද්රව්ය ජාවාරම්කරුවෙකුට දේශපාලන රැකවරණය ලබා නොදෙන බව ජනාධිපති අනුර කුමාර දිසානායක මහතා අවධාරණය කරයි. ජනාධිපතිවරයා මේ බව ප්රකාශ කළේ "රටම එකට" ජාතික මෙහෙයුමේ උතුරු පළාත් වැඩසටහනට යාපනයේදී එක්වෙමිනි.
මෙහිදී වැඩිදුරටත් අදහස් දැක්වූ ජනාධිපතිවරයා කියා සිටියේ මත්ද්රව්ය උවදුර හේතුවෙන් රටේ අනාගත පරපුර දැවැන්ත විනාශයකට මුහුණ දී ඇති බවයි. මීට පෙර පැවති පාලන සමයන්හිදී ඇතැම් දේශපාලන අධිකාරීන්ගේ මැදිහත්වීම මත මත්ද්රව්ය ජාවාරම්කරුවන් නීතියෙන් බේරී කටයුතු කළ ද, මින් ඉදිරියට එවැනි තත්ත්වයන්ට කිසිසේත්ම ඉඩ නොතබන බව ඔහු පැවසීය.
නිලධාරීන්ට දුන් අවසන් නිවේදනය
මත්ද්රව්ය ජාලයන් සමඟ සබඳතා පවත්වන රජයේ නිලධාරීන් සහ ආරක්ෂක අංශ සාමාජිකයන් සම්බන්ධයෙන් ද ජනාධිපතිවරයා මෙහිදී දැඩි ස්ථාවරයක සිටියේය.
මත්ද්රව්ය ජාවාරම්කරුවන්ට උදව් කරන හෝ ඔවුන් සමඟ සබඳතා පවත්වන නිලධාරීන් සිටී නම් වහාම එම කටයුතුවලින් ඉවත් විය යුතුය.
එසේ නොවන්නේ නම්, ඔවුන්ට එරෙහිව දැඩිව නීතිය ක්රියාත්මක කරන බවත්, තරාතිරම නොබලා දඬුවම් ලබා දෙන බවත් ජනාධිපතිවරයා අවධාරණය කළේය.
"රටම එකට" ජාතික මෙහෙයුම
මත්ද්රව්ය උවදුර රටින් තුරන් කිරීම සඳහා රජය විසින් ආරම්භ කර ඇති මෙම වැඩසටහන මේ වන විට දිවයිනේ සියලුම පළාත් ආවරණය වන පරිදි ක්රියාත්මක වේ. මෙහිදී මත්ද්රව්ය වැටලීම්වලට පමණක් සීමා නොවී, ඇබ්බැහි වූවන් පුනරුත්ථාපනය කිරීම සහ පාසල් දරුවන් දැනුවත් කිරීමේ පුළුල් වැඩපිළිවෙළක් ක්රියාත්මක කරන බව ද රජය සඳහන් කරයි.
යාපනය තාක්ෂණ විද්යාලයීය ක්රීඩා පිටියේදී පැවැත්වූ මෙම අවස්ථාවට උතුරු පළාතේ මහජන නියෝජිතයන්, රාජ්ය නිලධාරීන් සහ විශාල ජනතාවක් සහභාගී වී සිටියහ.
