Sunday, January 20, 2019

ඔවුන් මාව පැහැරගන්න කලින් මං මගේ ජීවිතය අවසන් කරගන්න සූදානමින් හිටියේ" - කැනඩාවේ රැකවරණ ලබන තරුණිය මුල්වරට මාධ්‍යයට කී කතාව

සිය පවුල වෙත යළි හරවා ලැබුවහොත් තමන් මරා දමනු ඇතැයි බිය වූ බව රහෆ් මොහොමඩ් කියා සිටියා.

තමන්ට වඩාත් ස්වාධීන ජීවිතයක් ගත කළ හැකි බැවින් "අවදානමක් ගැනීම සුදුසු" යැයි හැඟුණු බව ටොරොන්ටෝ ස්ටාර් සහ සීබීසී පුවත් සේවා වෙත අදහස් දක්වමින් ඇය සඳහන් කළා.

"මට නැති වෙන්න දෙයක් තිබුණේ නැහැ,"

"අපිට සලකන්නේ භාණ්ඩයකට වගේ. හරියට වහලුන්ට වගේ. මගේ කතාව සහ සෞදි කාන්තාවන්ට මොකක් ද වෙන්නේ කියලා මිනිස්සුන්ට කියන්න මට ඕන වුණා"

සෞදි අරාබියේ පුරුෂ භාරකාරත්ව ක්‍රමවේදය අනුව රටෙන් බැහැර යාම, ආණ්ඩුවේ ශිෂ්‍යත්වයක් ලබා
විදෙස් රටක අධ්‍යාපනය ලැබීම, විවාහ වීම මෙන් ම බන්ධනාගාරයකින් නිදහස ලැබීම සඳහා ද කාන්තාවන් ඥාති පුරුෂයෙකුගෙන් අවසර ලබා ගත යුතුයි.

අල් කුනන් යන සිය වාසගම අත්හළ රහෆ් මොහොමඩ් පවුලේ සාමාජිකයන් තමන් ශාරීරිකව සහ මානසිකව අපයෝජනයට ලක් කළ බවට චෝදනා කරනවා.

"මුලදී මම කොණ්ඩෙ කොටට කැපු අවස්ථාවේ ඔවුන් මාස හයක් මාව කාමරේ හිර කළා. මොක ද ඉස්ලාම් දහමට අනුව පිරිමියෙක් වගේ ඇඳීම තහනම්" ටොරොන්ටෝ අගනුවර පිහිටි සංක්‍රමණික කාර්යාලයක පැවති මාධ්‍ය හමුවකදී අදහස් දක්වමින් ඇය කියා සිටියා.

"නමුත් මම වඩාත් ම ප්‍රචණ්ඩත්වයට ලක් වුණේ මගේ මව සහ සහෝදරයා අතින්. ඔවුන් මට පහර දුන්නා. ශාරීරිකව වද දුන්නා,"

තායිලන්තයේ රැඳී සිටින අවස්ථාවේ බීබීසී වෙත අදහස් දක්වමින් රහෆ් මොහොමඩ් කියා සිටියේ, තමන් ඉස්ලාම් දහම අත්හළ බවයි. එය සෞදි අරාබිය තුළ මරණ දණ්ඩනය ලබා දිය හැකි අපරාධයක් ලෙස සැලකෙනවා.

සිය පවුල සමග කුවේට්හි සංචාරයක නිරත වූ ඇය බැංකොක් වෙත පළා ආවේ, පසුගිය ජනවාරි 05 වන දායි. ඕස්ට්‍රේලියාව වෙත යාමේ අරමුණින් පැමිණි තමන් සතුව එරට වීසා බලපත්‍රයක් තිබූ බව ඇය සඳහන් කළා.

නමුත් තමන් ගුවන් යානයෙන් පිටතට පැමිණි අවස්ථාවේ සෞදි තානාපති නිලධාරියෙකු පැමිණ සිය ගමන් බලපත්‍රය ඔහු භාරයට ගත් බව රහෆ් මොහොමඩ් පැවසුවා.

තායිලන්තයේ කොටු වූ ඇය විසින් උපකාර ඉල්ලා ට්විටර් පණිවුඩ ගණනාවක් නිකුත් කරනු ලැබුවේ ඉන් අනතුරුවයි.

"ඒ කාලය ඇතුළත මම කල්පනා කළේ කුමන ආකාරයේ සමුගැනීමේ පණිවුඩ මම ලියනව ද කියලා. මොක ද මාව ඔවුන් අතට පත් වෙන්න මම ඉඩ දෙන්නේ නැහැ. ඔවුන් මාව පැහැර ගැනීමට ප්‍රථම මගේ ජීවිතය අවසන් කර ගන්න මම සූදානම් වුණා," ඇය සීබීසී පුවත් සේවයට පැවසුවා.

රහෆ් මොහොමඩ් මුහුණ පා සිටි තත්ත්වය මානව හිමිකම් සම්බන්ධයෙන් කටයුතු කරන හියුමන් රයිට්ස් වොච් සහ මාධ්‍යවේදීන් ගණනාවකගේ අවධානයට ලක් වුණා.

තායිලන්ත බලධාරීන් පසුව ඇයට එහි රැඳී සිටීමට අවසර ලබා දුන් අතර ඇයට රැකවරණය ලබා දීම සම්බන්ධයෙන් එක්සත් ජාතීන්ගේ අවධානය යොමු වුණා.

අඟහරුවාදා (ජනවාරි 15) ටොරොන්ටෝ නුවරදී මාධ්‍ය වෙත ප්‍රකාශයක් කරමින් රහෆ් මොහොමඩ් තමන් හඳුන්වා දුන්නේ, "වාසනාවන්ත අයගෙන් එක් අයෙක්," යනුවෙනුයි.

සංචාරය කිරීම, අධ්‍යාපනය සම්බන්ධයෙන් තීරණ ගැනීම, අනාගත වෘත්තිය හෝ කෙදිනක, කවුරුන් සමග ද තමා විවාහ විය යුත්තේ" යන කරුණු සම්බන්ධයෙන් ස්වාධීන තීරණ ගැනීමට අවශ්‍ය බව ඇය එහිදී කියා සිටියා.

"මට මේ කිසිවක් සම්බන්ධයෙන් තීරණයක් ගැනීමට හැකියාවක් තිබුණේ නැහැ," යනුවෙන් අරාබි බසෙන් කී ඇය "අද මම ආඩම්බරයෙන් කියනවා මේ සියලු තීරණ ගැනීමේ හැකියාව මට තිබෙනවා," යනුවෙන්.

රහෆ් මොහොමඩ් සරණාගතයෙකු වශයෙන් භාර ගනු ලැබ ඇති බව කැනඩාවේ අග්‍රාමාත්‍ය ජස්ටින් ටෲඩෝ පසුගිය සිකුරාදා නිවේදනය කළා.

පසු දින ටොරොන්ටෝ ජාත්‍යන්තර ගුවන් තොටුපොළේදී ඇයට කැනඩාවේ විදේශ අමාත්‍යවරිය ක්‍රිස්ටියා ෆ්‍රීලන්ඩ් හමුවුණා.

සෞදි අරාබියේ පුරුෂ භාරකාරත්ව ක්‍රමය ඉවත් කරන ලෙස ඉල්ලා හඬ නැගූ කාන්තා අයිතීන් පිළිබඳ ක්‍රියාකාරිනියන් කීප දෙනෙකු නිදහස් කරන ලෙස කැනඩාවේ විදේශ අමාත්‍යවරිය සහ ඇයගේ අමාත්‍යංශය පසුගිය අගෝස්තු මස කළ ඉල්ලීම සෞදි අරාබියේ කෝපයට ලක් වුණා.

සිය රටේ අභ්‍යන්තර කටයුතුවලට "මැදිහත් වීම" සම්බන්ධයෙන් සෞදියේ සිටි කැනේඩියානු තානාපතිවරයා රටින් නෙරපීමට කටයුතු කළ සෞදි අරාබිය කැනඩාව හා සම්බන්ධ සියලු ම නව ගිවිසුම් අත්හිටුවීමට කටයුතු කළා.

රහෆ් මොහොමඩ් කැනඩාවට පැමිණි පසු සෞදි රජය ඒ සම්බන්ධයෙන් කිසිදු අදහසක් පළ කර නැහැ.

නමුත් සෞදි රජයේ මුල්‍ය ප්‍රතිපාදන මගින් ක්‍රියාත්මක මානව අයිතිවාසිකම් සඳහා වන ජාතික සමාජයේ ප්‍රධානියා සඳුදා අදහස් දක්වමින් පවසා තිබුණේ "සිය පවුල්වල වටිනාකම්වලට එරෙහිව කැරලි ගසන වරදකාරී සෞදි කාන්තාවන්ට ඇතැම් රටවල් උල්පන්දම් දීම සම්බන්ධයෙන් තමන් පුදුමයට පත්වන" බවයි.

මේ අතර, සිය අලුත් නිවහන පිළිබඳ අදහස් දක්වමින් රහෆ් මොහොමඩ් කියා සිටියේ "මානව හිමිකම්වලට ගරු කරන රටක් වන කැනඩාව තුළ මට දැඩි ආරක්ෂාවක් දැනෙනවා," යනුවෙනුයි.

"මගේ පැමිණීම බලාපොරොත්තුවෙන් සිටි සැම දෙනාගෙන් ම ලැබෙන ආදරය හමුවේ යළි උපන්නා වගේ මට දැනෙනවා,"

අලුත් අත්දැකීම් විඳ ගැනීමේ බලාපොරොත්තුවෙන් පසුවන ඇය "මම මීට පෙර කර නැති දේවල් උත්සහ කර බලාවි. ඉගෙන ගන්න නොහැකි වූ දේවල් ඉගෙන ගනීවි. මම ජීවිතය සොයා යනවා.... රැකියාවක් කරාවි, මම සාමාන්‍ය ජීවිතයක් ගත කරාවි," යනුවෙනුයි.

කැනඩාව වෙත පැමිණි රහෆ් මොහොමඩ් එරට කාලගුණයට ඔරොත්තු දෙන ආකාරයේ ඇඳුම් පැළඳුම් ගෙන ඇති අතර අලුතින් ස්මාර්ට් ජංගම දුරකතනයක් ද මිලට ගත් බව එරට සංක්‍රමණික ඒජන්සිය පවසනවා.

කැනඩාවේ රැකවරණ පතා පැමිණෙන සරණාගතයන්ට වසරක් ගත වන තෙක් එරට ආණ්ඩුව මූල්‍ය පහසුකම් ලබා දේ. එමෙන් ම නිවසක් සොයා ගැනීම, පළාත් වැඩසටහන් සඳහා ලියාපදිංචි වීම සහ ඉංග්‍රීසි භාෂාව ඉගෙනීම සඳහා ද උපකාර වනවා.

සමාජ ජාල ඔස්සේ තර්ජන එල්ල වන බැවින් රහෆ් මොහොමඩ් සඳහා පෞද්ගලික ආරක්ෂකයෙකු යොදවා ඇති බව කැනඩාවේ සංක්‍රමණික බලධාරීහු පවසනවා.

එක්සත් ජාතීන්ගේ සරණාගතයන් පිළිබඳ කොමිසමේ "නිශ්චිත ඉල්ලීමක්" මත රහෆ් මොහොමඩ් වෙත රැකවරණය ලබා දුන් බව අගමැති ජස්ටින් ටෲඩෝ පවසනවා.

"අප දන්නවා මෙය සුවිශේෂී සිදුවීමක්. නමුත් කැනඩාව සෑම මොහොතක ම දුෂ්කරතා සඳහා මුහුණ දෙන මිනිස්සු වෙනුවෙන් ඉන්නවා,"

-බීබීසී සිංහල-


------------


Contact Us
Email - gossipclanka@hotmail.com
Editor - gossipclanka@hotmail.com
Help desk - gossipclanka@hotmail.com

About Us
GossipClanka.com is a Sri Lankan online Gossip news website with rich content of 24 hours updated Sri Lankan and world news Reporting in English and Sinhala language. The premium exclusive Sri Lankan Online News Network providing around the clock breaking news in local, international, world, politics, sports, entertainment, hot gossip and event photos. We provide Sri Lanka news, Latest News updates and information, Sri Lanka Business News, Breaking news and updates, celibrity Gossip , Sri Lanka cricket news, Business and finance news, A collection of news items from many sources, Stock Market News and Discussions, Balanced Independent news provider, Breaking Hot News from Sri Lanka, Entertainment hot gossip update throughout the day, include Sri Lanka news paper articles written in Sinhala and English Language.


© 2020 GossipClanka